AGJËRIMI I GJASHTË DITËVE TË MUAJIT SHEVAL

(Urtësia e veçimit të muajit Sheval dhe sqarimi i dyshimeve rreth tij)

Nga Ebu Ejub el-Ensari përcillet se Pejgamberi, sal-lAllahu alejhi ve sel-lem, ka thënë:
“Kush agjëron Ramazanin dhe pastaj e pason me agjërimin e gjashtë ditëve të muajit Sheval, është sikur të ketë agjëruar tërë vitin.”
(Transmeton Muslimi, 2/822, nr. 1164)

Dihet se veprat e mira shpërblehen dhjetëfish, siç thotë Allahu në Kuran:
“Kush vjen me një (punë) të mirë, ai (në Ditën e Gjykimit) shpërblehet dhjetëfish.”
(El-En’am: 160)

Duke e llogaritur muajin e Ramazanit si dhjetë muaj dhe gjashtë ditët e Shevalit si dy muaj, përfundimi është se ai që i agjëron ato merr shpërblimin e një viti të plotë.

Kjo mbështetet në transmetimin e Thevbanit, ku Pejgamberi, sal-lAllahu alejhi ve sel-lem, ka thënë:
“Agjërimi i Ramazanit llogaritet (në shpërblim) si agjërimi i dhjetë muajve, ndërsa agjërimi i gjashtë ditëve llogaritet (në shpërblim) si agjërimi i dy muajve, kështu që është sikur të ketë agjëruar tërë vitin.”
(Transmetojnë: Ibën Maxheh, 1/547, nr. 1715; Ahmedi, 37/94, nr. 22412; Ibën Huzejme në Sahihun e tij, 3/31, nr. 2192 – teksti është i Ibën Huzejmes. Hadithi është i saktë.)

Nga ky ajet dhe hadithet e përmendura kuptohet qartë se çdo vepër e mirë shpërblehet dhjetëfish. Kështu, lind pyetja: Nëse dikush agjëron gjashtë ditë gjatë muajve të tjerë, si Muharremin, Shabanin, etj., a do të arrijë shpërblimin e një viti të plotë agjërimi apo jo?

Apo, thënë ndryshe: A ka ndonjë shpërblim shtesë për faktin që këto ditë janë specifikuar në muajin Sheval?

Rreth kësaj çështjeje, dijetarët kanë mendime të ndryshme. Disa thonë se kjo është një nxitje për të nxituar në vepra të mira, ndërsa të tjerë argumentojnë se muaji Sheval nuk ka ndonjë veçori të veçantë dhe se agjërimi i këtyre ditëve në muajt e tjerë do të kishte të njëjtin shpërblim, por personi do ta humbiste vlerën e përshpejtimit të kësaj vepre pas Ramazanit.

A ka Shevali një veçori të veçantë?

Mendimi se dikush që agjëron gjashtë ditë në muajt e tjerë e arrin shpërblimin e përmendur në hadith nuk është i saktë. Fakti që në hadith specifikohet muaji Sheval tregon se ai ka një veçori të veçantë.
Veprat më të mira me të cilat robi i afrohet Allahut janë ato që Ai i ka bërë obligim.

Nga Ebu Hurejre, radiAllahu anhu, përcillet se Pejgamberi, sal-lAllahu alejhi ve sel-lem, ka thënë:
“Allahu i Lartësuar thotë: ‘Robi im nuk më afrohet me asgjë më të dashur sesa me veprat që ia kam bërë obligim…’”
(Transmeton Buhariu, 8/105, nr. 6502.)

Kështu, nga hadithet e Ebu Ejubit dhe Thevbanit kuptojmë se shpërblimi i përmendur është për agjërimin farz (obligativ). Kjo do të thotë se ai që agjëron Ramazanin ka shpërblimin e dhjetë muajve agjërim farz, dhe ai që e pason me gjashtë ditët e Shevalit e plotëson shpërblimin e një viti të tërë agjërimi farz.

Abdullah ibën Mubareku thotë:
“Ky kuptim është përcjellë në disa hadithe, pra, shpërblimi i agjërimit të këtyre ditëve bashkohet me shpërblimin e agjërimit të Ramazanit.”
(Xhamiu’ et-Tirmidhi, 3/123.)
Ai duket se i referohet hadithit të Ummu Selemes, e cila thotë:
“Kush agjëron ditën pas Fitër Bajramit, është sikur të ketë agjëruar Ramazanin.”
Megjithatë, zinxhiri i transmetimit të këtij hadithi është i dobët.

Ibën Rexheb el-Hanbeli, Allahu e mëshiroftë, thotë:
“Nëse dikush thotë: ‘Nëse ndonjëri i agjëron gjashtë ditë jashtë muajit Sheval, a do ta arrijë të njëjtin shpërblim?’ – përgjigjja është: ‘Agjërimi i ditëve të Shevalit bashkohet me shpërblimin e Ramazanit, duke u llogaritur si agjërim farz i një viti të plotë.’”
(Lataif el-Ma’arif, fq. 493.)

Për më shumë detaje mbi këtë temë, mund të shihni edhe:
- “Sherh Mushkili el-Athar” të imam Tahaviut (6/119-130).
- “Lataif el-Ma’arif” të ibën Rexhebit (fq. 308).

Allahu e di më së miri!

Dr. Bali SADIKU
VITI-KOSOVË